Tuesday 16th of October | २०७५ असोज ३० मंगलबार

न्यूज अभियान
हरेक खबर विशेष खबर

पार्टीमा संस्थागत निर्णय नभएर समस्या देखिएको छ : डा. वेदुराम भुसाल, स्थायी समिति सदस्य

न्यूजअभियान | प्रकाशित मिति : २०७५ असोज २२ सोमबार |
newsabhiyan
newsabhiyan

अहिले प्रमुख सत्तारुढ दल नेपाल कम्युनिष्ट पार्टी (नेकपा) मा अध्यक्ष तथा प्रधानमन्त्री केपी शर्मा ओलीले एकलौटी गरेको भन्दै नेता माधवकुमार नेपाल पक्ष चर्को आलोचनामा सार्वजनिक रुपमा नै प्रस्तुत भएका छन् । नेता नेपालले संसदनामा आफ्नै पार्टीका अध्यक्ष नेतृत्वको सरकारले जनताको चाहना अनुरुपको काम गर्न नसकेको भन्दै आलोचना गरे । चियापान कार्यक्रम नै गरेर नेताहरुसंग कसरी अगाडि बढ्ने भन्ने सुझाव पनि मागे । खासमा नेपालको ओलीसंगको असन्तुष्टि के विषयमा हो भन्ने विषयमा हामीले उनी पक्षका नेता नेकपाका स्थायी समिति सदस्य डा. बेदुराम भुसालसंग जान्ने प्रयास गरेका छौं । प्रस्तुत छ त्यही कुराकानीको सारसंक्षेप :-

सरकारसंग यहाँहरुको असन्तुष्टि के विषयमा हो ?
सरकारले जनताको चित्त बुझ्ने गरी काम गर्नुपर्ने हो । तर, वर्तमान सरकारले त्यो ढंगले काम गर्न सकेको छैन । शान्ति सुरक्षा भएन, मूल्यवृद्धिमा नियन्त्रण भएन, विकास निर्माणका कुनै राम्रा योजना आएनन, चुनावको बेलामा जति प्रतिबद्धता जाहेर गरिएको थियो, त्यसअनुसार काम भएन भनेर आमजनताले गुनासो गरिरहेका छन् । हामीले पनि त्यही गुनासो मात्रै गरेर सुध्रन आग्रह गरेका हौं ।

जनताको भावना अनुरुपको काम गर्न नसकेकै हो ?
लामो लडाइँ लडेर देशमा जुन खालको परिवर्तन ल्याइयो, त्यही परिवर्तनलाई व्यवहारमा लागु गर भनेर जनताले एकलौटी बलियो सरकार सञ्चालन गर्ने म्याण्डेट दिएका छन् । बलियो सरकार गठन भएको ६ महिना पुगेर बढी भएपछि अब परिणाम दिने बेला आएको छ ।

वामपन्थीको दुई तिहाइसहितको बलियो सरकार सञ्चालन गर्न मत दिएका बेला जनताको भावना समेटिने गरी, चुनावका बेला जनतासामु जे बोलिएको थियो, त्यसैअनुरूप गरिनुपर्छ । जनताको अपेक्षा त्यही हो, हाम्रो पनि त्यही नै हो । तर, सरकारले सोही अपेक्षाअनुसार नगरेपछि जनतामा निराशा छाएको छ ।

सबैले सरकारको आलोचना गरिरहेका छन् । हामी पनि यही समाजका सदस्य हौं । आमजनता जहाँ छन्, हामी पनि त्यहीँ भित्रै छौं, म पनि त्यहीँ छु । त्यसकारण आज जनताले जे भनिरहेका छन, हामी पनि त्यही भनिरहेका छौँ । सरकार सुध्रेर जनताको पक्षमा काम गरोस भन्ने मात्रै हाम्रो अध्यय हो ।

यहाँहरुले सरकारले राम्रो काम गरेन, पार्टीभित्रैबाट सरकारको नेतृत्व परिवर्तनको विकल्पको खोजी सुरु गर्नु भएको हो ?
आजसम्मका कमी–कमजोरीलाई हटाएर सरकारले जनभावना अनुसार काम गर्नुपर्छ । हाम्रो मनाई विसुद्ध त्यही हो । अहिले अर्को कुनै सरकार खोज्नुपर्ने अवस्था पनि छैन । आवश्यकता पनि छैन । जरुरी त झन हुँदै होइन । कसैले त्यो खोजेको पनि छैन, चाहेको पनि छैन ।

त्यसोभए सार्वजनिक रुपमा नै पार्टी नेतृत्व सम्हाली सकेको र प्रधानमन्त्री भइसकेको नेताले किन आलोचना गर्नु भएको त ?
हामीले सरकारले काम नगर्दा स्थिति बिग्रन लाग्यो, बिग्रन दिनु हुन्न मात्रै भनिरहेका छौ । सरकारले राम्रोसँग काम गर्नुपर्छ । काम गर्ने सन्दर्भमा केही समस्या भएमा पार्टीमा छलफल गरेर समाधान निकाल्नु पर्छ भनिरहेका छौं ।

यावत् सम्भावना छँदाछँदै दूरगामी नकारात्मक प्रभावबारे जान हुदैन । नेकपाले अहिलेसम्म काम गरेर देखाएको छ, अहिले पनि गर्छ । सरकारले आजसम्मका कमीलाई हटाएर काम गरेर देखाउँनु पर्छ । यो भन्दा अर्को विकल्प सोच्ने र मुलुक नै बिग्रन लाग्यो भनेर आत्तिनु पर्ने बेला भएको छैन ।

पार्टीभित्र नेताहरुबीच देखिएका समस्या समाधान गर्न के गर्नुपर्छ ?
पार्टीभित्र विचार र कार्यशैलीमा विविधता हुन्छ । दुनियाँमा जहिलेदेखि राजनीतिक पार्टी जन्मिए, तबदेखि नै विचारका विविधता देखिँदै आएका छन् । तिनको निराकरणका लागि छलफल हुन्छ, बहस हुन्छ । त्यसैले त बहुमतले निर्णय गर्नुपर्छ भन्ने मान्यता स्थापित भएको हो ।

सबैको धारणा एउटै हुने भए त बहुमत, अल्पमतको सिद्धान्त नै प्रतिपादन हुने थिएन । नेपालमा विचारमा विविधता नेकपा बनेपछि मात्र भएको हो र ? यो त जबदेखि पार्टीहरू जन्मिए, तबदेखि नै चल्दै आएको छ । फेरि एकपटक विविधता भएपछि सधैँ सबै विषयमा विविधता हुन्छन् भन्ने पनि होइन । बहस र छलफलबाट निकास निकाल्ने पर्यत्न नेतृत्वले गर्नुपर्छ ।

पछिल्लो समय नेतृत्वले गुट हेरेर जिम्मेवारी दिने गरेको आवाज पनि कता कता सुनिन्छ नि ?
पार्टीभित्र समूह भएकैले बहस र छलफल हुने हो । एउटा समूहमा भएकाहरू भोलि अर्कै समूहमा पर्न सक्छन् । नेकपा बनेपछि हिजोको समीकरण नहुन सक्छ । त्यसकारण हिजोको आँखाबाट फलानो गुटबाट परे कि परेनन् भन्ने ढंगले हेर्नु हुँदैन । त्यसरी हरेर गर्ने विश्लेषण अधुरो र अपरिपक्व हुन्छ ।

अहिलेको नयाँ अवस्थालाई नबुझी गरिएको विश्लेषण  हुन जान्छ । पार्टी भनेको केही बोल्नै नपाउने, भन्नै नपाउने भन्ने हुन्छ र ? पार्टी भनेको त्यस्तो हो र ? पार्टीमा आफ्ना कुरा राख्न पाइन्छ ।

मिडियामा आएजस्तो यो गुटको प¥यो, त्यो गुटको परेन भन्ने ढंगले छलफल भएका छैनन् । हाम्रो छलफल भनेको व्यक्तिले व्यक्ति छान्ने ढंगले पार्टी चल्ने होइन, विधि, पद्धति र मापदण्डका आधारमा संस्थागत ढंगले जाऔँ भन्नेमा हो, हाम्रो जोड त्यसमा हो ।

त्यसोभए पछिल्लो समय नेकपाभित्र देखिएको मुख्य समस्या के हो त ?
एकता गरेर ठूलो बनाइएको पार्टी नेकपालाई कसरी चलाउँछौँ ? भन्ने प्रश्न यतिवेलाको मूल प्रश्न हो । यद्यपि हिजो पनि हामी ठूला पार्टी (एमाले र माओवादी केन्द्र) थियौँ । हामीले यो पार्टीलाई निश्चित विधि, पद्धति र मापदण्डका आधारमा संस्थागत निर्णय गर्ने तरिकाले चलाउँछौँ अथवा यो पार्टीलाई व्यक्तिले व्यक्ति छनोट गर्ने विधिबाट चलाउँछौँ भन्ने यतिवेलाको सबैभन्दा मूल प्रश्न हो ।

बाँकी एकता प्रक्रिया कसरी अगाडि बढाउने, एकतापश्चात् पार्टीलाई कसरी चलाउने भन्ने प्रश्न अहिलेको मुख्य प्रश्न हो । त्यस प्रश्नमा हामीले विभिन्न ढंगबाट छलफल चलाइरहेका छौँ । त्यही छलफलका क्रममा मापदण्डका कुरा उठिरहेका छन् । सर्कुलर जारी हुँदैमा विधिसम्मत ढंगले काम भएको भन्ने हुँदैन ।

त्यसअघि कुनै मापदण्ड बने कि बनेनन् र त्यस्ता मापदण्डमा टेकेर संस्थागत निर्णय भयो कि भएन भन्ने हेर्नुपर्छ । कसैले निर्देशन र्गयो, त्यही मापदण्ड र विधि भयो भन्ने हुँदैन ।

सचिवालयमा मापदण्डको कुरा टुंगिएको छैन । केही साथीलाई विभिन्न पद (प्रदेश इन्चार्ज, सहइन्चार्ज, अध्यक्ष र सचिव) मा मनोनीत गर्दा पहिला तोकिएको आंशिक मापदण्ड बाहिर गएर निर्णय गरिएको छ । थप मापदण्ड बनाएर जाऔँ भन्ने जुन छलफल चलिरहेको थियो, ती छलफल बीचैमा रोकिए । मापदण्ड नटुंगिई अर्को निर्णय भएकाले केही विवाद सिर्जना भएको हो ।

अहिले देखिएका विवादका विषयमा समाधानको उपयुक्त बाटो के हुन सक्ला ?
व्यक्ति–व्यक्ति मिलेर समूह  र समूह समूह मिलेर पार्टी बन्ने हो । पार्टीले निर्णय लिदाँ सामूहिक रुपमा लिनु पर्छ । व्यक्तिले व्यक्ति छान्ने तरिका संस्थागत हुँदैन । त्यो व्यक्तिगत मात्र हुन्छ । संस्थागत ढंगले निश्चित विधि, पद्धति र मापदण्डका आधारमा जानेबित्तिकै सम्पूर्ण समस्याको समाधान हुन्छ ।

त्यो विधि, पद्धति र मापदण्डभित्र सबै काम पर्छन् र त्यसपछि सिस्टमले काम गर्न थाल्छ । त्यो अवस्थामा कसैले पनि चिन्ता गर्नुपर्ने स्थिति आउँदैन । को व्यक्ति कहाँ पर्छ भन्ने ढंगबाट हामीले मापदण्ड निर्धारण गर्छाैं भने समस्या हुन्छ ।

व्यक्ति नहेरी मापदण्ड बनाएर अगाडि बढ्ने हो भने फलानो हुन्छ कि हुँदैन, ढिस्कानो हुन्छ कि हुँदैन भनेर चिन्ता गर्नैपर्दैन । अहिले त विधि, पद्धति र मापदण्डतिर होइन कि फलानो नेता कि ढिस्कानो नेता भन्नेतिर लागेर बिग्रिएको हो ।

स्थितिलाई यो भन्दा बढी बिग्रन नदिई हामीले निश्चित मापदण्ड, विधि र पद्धतिका आधारमा संस्थागत निर्णय गरेर अगाडि बढ्नुपर्छ । त्यसरी जान सकेमा कसैले पनि गुनासो गर्नुपर्ने अवस्था बन्दैन, काम पनि फटाफट हुन्छन् ।

छलफल गरेर कमी–कमजोरी सच्याउँदै अगाडि बढ्नुपर्छ । पहिला विधि, मापदण्ड तयार पार्नुपर्छ । त्यसैको आधारमा काम अगाडि बढाउनुपर्छ । त्यसपछि जो–जो पर्छन, पर्छन, त्यसमा विरोध पनि हुँदैन र गुनासो पनि हुँदैन । राजतिलकका साथमा ।


न्यूज अभियान डट कमको एन्ड्रोइड एपका लागि यहाँ क्लिक गर्नुहोस् । हरेक खबर विशेष खबरका लागि अफिसियल फेसबुकट्वीटर मार्फत जोडिनुहोस् ।


न्यूज अभियान TV - ग्यालेरी

View All
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan