न्यूज अभियान
हरेक खबर विशेष खबर

काठमाडौं, १४ भदौ । रसुवामा आएको विनाशकारी बाढीपछि उद्धार तथा खोजी कार्यलाई नेपाली सेनाले तीव्र बनाएको छ।

बाढीबाट प्रभावित टिमुरे, धुन्चे र हाकुवेसी क्षेत्रबाट चिनियाँ नागरिक ४ जनासहित १८३ जनाको उद्धार गरिएको नेपाली सेनाले जनाएको छ।

सेनाका हेलिकप्टरमार्फत आज बिहान ११ बजेसम्म प्रभावित क्षेत्रमा उद्धार अभियान सञ्चालन गरिएको हो।

जोखिमपूर्ण भौगोलिक अवस्थाका बीच सेनाले हवाई माध्यमबाट प्रभावित तथा जोखिममा रहेका नागरिकलाई सुरक्षित स्थानमा स्थानान्तरण गरिरहेको छ।

यसैबीच, त्रिशूली–३ जलविद्युत् आयोजनाको टनेलमा फसेका टोलीको उद्धारका लागि खोजी तथा उद्धार अभियान थप सघन बनाइएको छ।

भदौ १२ गतेदेखि अस्थायी रूपमा परिचालित संयुक्त टोलीमा विशेषज्ञ जनशक्ति थप गरिएको छ।

हाल ९३ सदस्यीय विशेषज्ञ टोलीले ड्रिलिङ मेसिन, स्काभेटर, हाइड्रोलिक कटरलगायत अत्याधुनिक उपकरण प्रयोग गर्दै टनेलभित्र फसेका व्यक्तिहरूको खोजी गरिरहेको छ।

बाढीको बहाव केही कम भएसँगै टनेलको प्रवेशद्वार पत्ता लगाउने काम पुनः सक्रिय रूपमा अघि बढाइएको सेनाले जनाएको छ।

बाढीले पुर्‍याएको क्षतिको खोज, उद्धार तथा राहत कार्यलाई प्रभावकारी बनाउन प्रभावित जिल्लाहरूमा नेपाली सेनाको ८ हजार ४ सयभन्दा बढी फौज परिचालन गरिएको छ।

विभिन्न सुरक्षा निकाय, स्थानीय प्रशासन तथा सम्बन्धित निकायसँग समन्वय गरी उद्धार, खोजी तथा राहत वितरणको काम भइरहेको छ।

बाढीको भेलले बाटो छेकिए पनि उद्धारको बाटो रोकिएको छैन—सेना जोखिमको बीचमा उभिएर जीवन खोजिरहेको छ।