न्यूज अभियान
हरेक खबर विशेष खबर

काठमाडौं । विपद् आउँदा शब्दभन्दा कर्म ठूलो हुन्छ। संकटको घडीमा आशा हराउँदै जाँदा उद्धारकर्ताको एउटा हात जीवनको सहारा बन्छ।

 यही मानवीय दायित्वलाई आत्मसात् गर्दै सशस्त्र प्रहरी बल नेपालले बाढी, पहिरो तथा अन्य विपद् प्रभावित क्षेत्रमा खोज, उद्धार र राहतलाई निरन्तरता दिइरहेको छ।

भोटेकोशी तथा त्रिशूली नदीमा आएको विनाशकारी बाढीले बस्ती, सडक, पुल, व्यापारिक केन्द्र र नागरिकको दैनिकीमा गहिरो चोट पुर्‍याएपछि सुरक्षाकर्मीहरू जोखिमसँग जुध्दै उद्धारमा परिचालित भएका छन्।

 नदीको उर्लंदो भेल, भत्किएका संरचना र पहिरोको जोखिमबीच पनि सशस्त्र प्रहरीका टोलीहरू प्रभावित नागरिकसम्म पुग्ने प्रयासमा निरन्तर जुटिरहेका छन्।

जहाँ बाटो छैन, त्यहाँ बाटो खोज्दै; जहाँ आवाज दबिएको छ, त्यहाँ जीवनको संकेत खोज्दै र जहाँ नागरिक असहाय छन्, त्यहाँ सुरक्षाको भरोसा बन्दै सशस्त्र प्रहरी परिचालित भएको छ।

एक हातको बन्दुक बिसाएर उद्धारका क्रममा जोखिमपूर्ण स्थानमा फसेका नागरिकलाई सुरक्षित स्थानमा सार्ने, घाइतेको उद्धार गर्ने, बेपत्ताको खोजी गर्ने तथा विस्थापितलाई राहत सामग्री पुर्‍याउने कार्यलाई प्राथमिकतामा राखिएको छ।

काँधमा केवल बन्दुक होइन, संकटमा जीवन जोगाउने जिम्मेवारी

विपद्को घडीमा सुरक्षा निकायको भूमिका केवल सुरक्षा प्रदान गर्नुमा सीमित हुँदैन। संकटमा परेका नागरिकका लागि उनीहरू उद्धारकर्ता, सहयोगी र भरोसाको अन्तिम आधार समेत बन्न पुग्छन्। त्यसैले सशस्त्र प्रहरीका जवानहरूको काँधमा केवल बन्दुक होइन, संकटमा परेका नागरिकको जीवन जोगाउने जिम्मेवारीसमेत छ।

बाढीले सडक बगाएको छ, पुल ढालेको छ, घर–व्यवसाय उजाडेको छ। तर विपद्ले सिर्जना गरेको निराशाबीच सशस्त्र प्रहरीका जवानहरूको सक्रियताले एउटा सन्देश दिएको छ—विपत्ति जति ठूलो भए पनि नागरिकको जीवन रक्षाका लागि राज्यका संयन्त्र पछि हट्दैनन्।

उद्धारमा खटिने प्रत्येक सुरक्षाकर्मीका लागि यो केवल ड्युटी होइन, मानव जीवनप्रतिको उत्तरदायित्व पनि हो। जोखिमको आँकलन गर्दै, आफ्नै ज्यानको पर्वाह नगरी अरूको जीवन जोगाउन अग्रपंक्तिमा उभिनु सुरक्षा सेवाको कठोर तर गौरवपूर्ण पक्ष हो।

बाढीको भेलसँग जुध्दै, निराशाको बीच आशा बाँड्दै

विपद्का बेला नागरिकलाई सबैभन्दा पहिले चाहिन्छ—भरोसा। त्यो भरोसा बोकेर सशस्त्र प्रहरी प्रभावित क्षेत्रमा पुगेको छ। राहतको एउटा प्याकेट, उद्धारको एउटा प्रयास र सुरक्षित स्थानसम्म पुर्‍याइएको एउटा जीवनले पीडित परिवारका लागि ठूलो अर्थ राख्छ।

संकट सकिएपछि मात्र सेवा होइन, संकट रहुन्जेल निरन्तर सेवा—यही भावनाका साथ सशस्त्र प्रहरी बल नेपाल खोज, उद्धार तथा राहत अभियानमा सक्रिय छ।

बाढीको भेलले संरचना बगाउन सक्छ, पहिरोले बाटो छेक्न सक्छ, तर कर्तव्यको बाटो छेक्न सक्दैन। यही दृढताका साथ सशस्त्र प्रहरीका सुरक्षाकर्मीहरू जोखिमको अग्रमोर्चामा उभिएका छन्।

प्राकृतिक विपद् प्रकृतिको कठोर परीक्षा सशस्त्र प्रहरीको जीवन्त प्रतिबिम्ब

प्राकृतिक विपद् प्रकृतिको कठोर परीक्षा पनि हो । तर त्यस परीक्षामा राज्यको संवेदनशीलता र सुरक्षा संयन्त्रको कर्मठता पनि मापन हुन्छ। 
 तहसनहस जनजीवनका बेला सशस्त्र प्रहरी बल नेपालले खोज, उद्धार र राहतमा देखाएको सक्रियता प्रशंसनीय मात्र होइन, राज्यको मानवीय अनुहारको जीवन्त प्रतिबिम्ब हो।

विपद्को घडीमा नागरिकका लागि समय नै सबैभन्दा ठूलो चुनौती हुन्छ। चारैतिर पानीको भेल, भत्किएका संरचना, अवरुद्ध सडक र अनिश्चितताको कुहिरोबीच उद्धारकर्मीको उपस्थिति नै आशाको पहिलो किरण बन्छ।

 यही कठिन क्षणमा सशस्त्र प्रहरीका सुरक्षाकर्मीहरू आफ्नो ज्यानको जोखिम मोलेर नागरिकको जीवन रक्षामा खटिएका छन्। उनीहरूको हातमा केवल उद्धारका उपकरण छैनन्, कर्तव्यबोध, साहस र मानवताको दियो पनि छ।

संकटको समयमा राहत केवल खाद्यान्न र औषधिको पोका होइन; त्यो पीडित मनमा राज्यप्रतिको भरोसा पुनर्जीवित गर्ने माध्यम पनि हो। बेपत्ताको खोजी, जोखिममा परेकाको उद्धार, घाइतेको सहजीकरण र विस्थापितलाई सुरक्षित स्थानमा पुर्‍याउने कार्यले यही भरोसालाई बलियो बनाउँछ।

सशस्त्र प्रहरी बलको सशक्त सक्रियता : विपद्मा नागरिकको भरोसाको बलियो आधार

विपद् बाजा बजाएर आउँदैन, तर जब प्रकृतिको रौद्ररूपले जनजीवन तहसनहस बनाउँछ, त्यतिबेला राज्यको उपस्थितिको वास्तविक परीक्षा सुरु हुन्छ।

बाढी, पहिरो र डुबानले त्रास फैलाइरहेको कठिन घडीमा सशस्त्र प्रहरी बलले देखाएको सक्रियता केवल उद्धारको अभियान होइन, नागरिकप्रतिको जिम्मेवारी र राष्ट्रसेवाको जीवन्त दृष्टान्त बनेको छ।

जोखिमको आँकलन गरेर सुरक्षित दूरीमा बस्ने होइन, जोखिमकै बीचमा पसेर जीवन जोगाउने साहस सशस्त्र प्रहरीको पहिचान बनेको छ। नदीको उर्लंदो भेल, भत्किएका संरचना, अवरुद्ध सडक र प्रतिकूल मौसमलाई चुनौती दिँदै सुरक्षाकर्मीहरू खोज, उद्धार, राहत तथा व्यवस्थापनमा निरन्तर खटिएका छन्।

बाढी, पहिरो र डुबानले बस्ती उजाड्दा जब नागरिकको आँखामा त्रास र मुटुमा निराशा थियो, त्यही बेला सशस्त्र प्रहरीका जवानहरू जोखिमको पर्वाह नगरी घटनास्थलतर्फ अघि बढे। उर्लिएको नदी, भत्किएको सडक, हिलोमाटो र अनिश्चित भूगोल उनीहरूका लागि अवरोध बनेनन्।

नागरिकको जीवन जोगाउन सुरक्षा संयन्त्र मैदानमै

जहाँ संकट, त्यहीँ सुरक्षा; जहाँ पीडा, त्यहीँ सशस्त्र प्रहरी—यो केवल नारा होइन, विपद्मा देखिएको व्यवहार हो। विपद्को अँध्यारोमा उनीहरूका हातमा बोकेको उद्धार सामग्रीभन्दा ठूलो शक्ति नागरिकको जीवनप्रतिको समर्पण हो। आफ्नै ज्यानको पर्वाह नगरी संकटमा फसेका नागरिकसम्म पुग्नु सुरक्षा सेवाको सर्वोच्च मानवीय रूप हो।

विपद्मा राज्य कहाँ छ ? भन्ने प्रश्न उठ्ने क्षणमा सशस्त्र प्रहरी बलको सक्रियताले जवाफ दिएको छ—राज्य नागरिकसँगै छ, र नागरिकको जीवन जोगाउन सुरक्षा संयन्त्र मैदानमै छ। यही सक्रियता, साहस र सेवाभावले सशस्त्र प्रहरी बललाई विपद्को घडीमा नागरिकको भरोसाको बलियो ढाल बनाएको छ।

तर विपद् व्यवस्थापन उद्धारमा मात्र सीमित हुनु हुँदैन। जोखिमको पूर्वानुमान, शीघ्र सूचना, पर्याप्त उपकरण, दक्ष जनशक्ति र तीनवटै सुरक्षा निकायबीच प्रभावकारी समन्वय उत्तिकै आवश्यक छ।

विपद्ले घर–बस्ती उजाड्न सक्छ, तर कर्तव्यको संकल्प उजाड्न सक्दैन। त्यसैले संकटको अँध्यारोमा नागरिकको जीवन जोगाउन अग्रपंक्तिमा उभिएको सशस्त्र प्रहरीप्रति सम्मान गर्दै राज्यले यस्ता जनशक्तिलाई अझ सक्षम, साधनसम्पन्न र प्रविधिमैत्री बनाउनु आजको अपरिहार्य आवश्यकता हो।

सुरक्षाकर्मीका पनि परिवार छन् तर राष्ट्रसेवामा खटिएका उनीहरु नागरिकको जीवन बचाउन परिवार मोह छाडेर काहालिलाग्दो भयावह चुनौतीको सामना गरिरहेका हुन्छन् । उद्धारमा जुटिरहेका हुन्छन् ।

नागरिकको दुःखमा साथ, विपद्मा उद्धारको हात र संकटमा सुरक्षाको ढाल—सशस्त्र प्रहरी बल नेपाल नागरिक सेवामा निरन्तर सक्रिय छ।

यो पनि पढ्नुहोस् :
रसुवामा बाढी : उद्धारमा सशस्त्र प्रहरीको व्यापक परिचालन, राहत सामग्रीसहित विशेष टोली प्रभावित क्षेत्रमा

भोटेकोशी बाढीः तेह्र सशस्त्र प्रहरी सम्पर्कविहीन