न्यूज अभियान
हरेक खबर विशेष खबर

काठमाडौं । नेपाली कांग्रेस जाजरकोटका नेता तथा महाधिवेशन प्रतिनिधि समिरजंग शाहले पार्टीको केन्द्रीय सदस्य पदमा उम्मेदवारी दिने तयारी गरेका छन्। 

लामो समयदेखि पार्टी संगठन र कार्यकर्तासँग निरन्तर जोडिँदै आएका नेपाल प्रेस युनियनका पुर्व अध्यक्ष तथा पुर्व महाप्रबन्धक शाहले केन्द्रीय तहमा रहेर पार्टीलाई थप गतिशील बनाउने उद्देश्यसहित आफ्नो दाबी अघि बढाएका हुन्।
जाजरकोटको राजनीतिक वृत्तमा सरल, मिजासिला र सहज व्यवहार गर्ने नेताका रूपमा परिचित शाह कार्यकर्तामाझ घुलमिल हुन सक्ने नेताका रूपमा चिनिन्छन्। 

राजनीतिक भेटघाटमा औपचारिकताभन्दा आत्मीयतालाई प्राथमिकता दिने उनको शैलीले पार्टीका विभिन्न तहका नेता तथा कार्यकर्तासँग सम्बन्ध विस्तार गर्न सहज बनाएको बताइन्छ।

पार्टीभित्र अवसर र जिम्मेवारीको खोजीमा केन्द्रित हुनुभन्दा संगठन निर्माण, कार्यकर्ताको समस्या सुन्ने र स्थानीय तहका मुद्दालाई पार्टीको राजनीतिक एजेन्डासँग जोड्नुपर्ने धारणा शाहले राख्दै आएका छन्। 

जाजरकोटजस्तो भौगोलिक रूपमा विकट जिल्लाबाट केन्द्रीय नेतृत्वमा प्रतिनिधित्व बलियो बनाउनुपर्ने आवाज पनि उनको उम्मेदवारीसँग जोडिएको छ।

शाहको दाबी केवल एउटा पदका लागि उम्मेदवारी दिने विषयमा सीमित नरहेको उनीनिकट नेताहरूको भनाइ छ। उनीहरूले शाहलाई नयाँ पुस्ता, स्थानीय कार्यकर्ता र केन्द्रबीच समन्वय गर्न सक्ने सम्भावित नेताका रूपमा प्रस्तुत गरेका छन्।
नेपाली कांग्रेसको आगामी महाधिवेशनमा विभिन्न पदमा आकांक्षीहरू बढिरहेका बेला शाहको केन्द्रीय सदस्य पदमा उम्मेदवारीको तयारीले जाजरकोटको कांग्रेस राजनीतिमा पनि नयाँ चर्चा सुरु भएको छ। 

लामो समयदेखि केन्द्रमा प्रभाव राख्दै आएका स्थापित नेतासँगै जिल्लाबाट नयाँ अनुहारको दाबीले महाधिवेशन प्रतिनिधिहरूको ध्यान तानेको छ।

शाह भने आफूलाई पदभन्दा जिम्मेवारी महत्वपूर्ण रहेको बताउँदै आएका छन्। पार्टीभित्रको गुटगत प्रतिस्पर्धाभन्दा संगठनलाई बलियो बनाउने, कार्यकर्ताको आवाजलाई केन्द्रसम्म पुर्‍याउने र कांग्रेसलाई जनतासँग अझ नजिक बनाउने विषयलाई प्राथमिकतामा राख्ने उनको भनाइ छ।

सरल बोली, मिजासिलो व्यवहार र संगठनप्रतिको निरन्तर सक्रियतालाई राजनीतिक पूँजी बनाउँदै शाहले केन्द्रीय सदस्यको यात्रामा अघि बढ्ने तयारी गरेका छन्। 

अब उनको उम्मेदवारीले महाधिवेशनको मैदानमा कस्तो राजनीतिक तरंग सिर्जना गर्छ भन्ने विषय कांग्रेस वृत्तमा चासोको विषय बनेको छ।