न्यूज अभियान
हरेक खबर विशेष खबर

धनगढी, २३ असोजः कञ्चनपुरको कृष्णपुर नगरपालिका–७ कलवपुरका चक्रबहादुर विकले विगत लामो समयदेखि धनगढी उपमहानगरपालिका–३ विशालनगरस्थित सडक छेउमै आरन पेशा गर्दै आउनु भएको छ । आफ्ना बाउबाजेको पालादेखिको पुख्र्याैैली पेशालाई उहाँले निरन्तरता दिँदै आउनुभएको छ ।

    केही वर्षअघि कमजोर आर्थिक अवस्थाको कारण दश वर्षजति अर्काकोमा ज्यालादारीमा काम गर्नु भएको विकले अहिले आफँै आरन व्यवसाय सञ्चालन गर्दै आउनुभएको छ । पछिल्लो समय आधुनिकतासँगै पुराना पेशा विस्थापित हुँदै गएको अवस्थामा उहाँले भने पुख्र्यौली पेशालाई निरन्तरता दिँदै आफनो श्रम र सीपबाट परिवारको जीविकोपार्जन गरिरहनुभएको छ ।

    आरन व्यवसायी विकले मासिक रूपमा रु ७० हजार बराबरको कारोबार गर्दै आउनुभएको छ । जसबाट सबै खर्च कटाएर रु २० हजार जति बचत हुने गरेको आरन व्यवसायी विकले बताउनुभयो ।
सामान्य लेखपढ मात्र गर्नुभएका उहाँकोे १२ जनाको जहान छ । उहाँसँग आम्दानीका अन्य कुनै आयस्रोत छैन । “घरका सबै परिवार यसै पेशाको कमाईमा मात्र निर्भर छन,” उहाँले भन्नुभयो, “परिवारको लालनपालनदेखि सम्पूर्ण खर्च आरन पेशाको कमाइ नै धानेको छु” ।

    बाल्यकालमा बुवासँगै फलामका विभिन्न औजार बनाउँने सिप सिक्नुभएका विकले पुख्र्यौली पेशाको सीप प्रयोग गर्दै यस पेशालाई आफनो आम्दानीको मुख्य स्रोत बनाउनु भएको छ ।  यो पेशाबाट परिवार पाल्न धौधौ पर्न थालेको उहाँको भनाइ छ । 

    “पुर्खाले गर्दै आएको सीप हो, यही काम सिकेर हुर्किएँ । अहिले पनि यही पेशाबाट जीवीकोपार्जन गर्दै आएको छु”, विकले भन्नुभयो, “कहिलेकाही काम पाउँन समस्या हुन्छ तर आफ्नो सीप भएकाले अरुको भर पर्नुपरेको छैन ।” 

    विकले आरनमा फलाम तताउने, पिटने, काट्ने र आवश्यक आकार दिने काम गर्दै आउनुभएको छ । जसबाट हँसिया, कुटो, कोदालो, हलोको फाली, लगाएतका कृषि औजार बनाएर बिक्री गर्ने गरेको बताउनुभयो । 

    स्थानीयस्तरमै रोजगारी सिर्जना गर्ने र परम्परागत सीपको संरक्षण गर्ने उद्देश्यले आरन पेशामा संलग्न व्यक्तिलाई आवश्यक तालिम, आधुनिक उपकरण तथा सहुलियतपूर्ण क्रृणको व्यवस्था गर्नुपर्ने विकको अपेक्षा छ ।