न्यूज अभियान
हरेक खबर विशेष खबर

काठमाडौं, १९ असोज ।  बाढी र पहिरोले सडक, पुल, खानेपानी तथा सञ्चार संरचनामा क्षति पुर्‍याउँदै जनजीवन प्रभावित भइरहेका बेला नेपाली सेनाले जोखिममा परेका बस्तीको उद्धारदेखि अवरुद्ध पूर्वाधार पुनःनिर्माणसम्मको कामलाई तीव्रता दिएको छ।

कालीगण्डकी नदीको तटीय तथा आसपासका क्षेत्रमा बाढी र पहिरोको जोखिम बढेपछि नेपाली सेनाले हवाई साधनमार्फत जोखिममा रहेका नागरिकलाई सुरक्षित स्थानमा स्थानान्तरण गर्नुका साथै राहत सामग्री ढुवानी र अवरुद्ध सञ्चार सेवा पुनःस्थापनामा समेत सरोकारवाला निकायसँग समन्वय गर्दै आएको छ।

विशेषगरी पर्वत, म्याग्दी र बागलुङ क्षेत्रमा बाढी–पहिरोले अवरुद्ध सडक तथा पुल खुलाउने काममा सेनाको सक्रियता बढेको छ। विपद्का कारण सडक सम्पर्क टुट्दा नागरिकको दैनिक आवागमनदेखि राहत तथा उद्धार सामग्री पुर्‍याउनसमेत कठिनाइ भइरहेको अवस्थामा सेनाको प्राविधिक तथा जनशक्ति परिचालनले प्रभावित क्षेत्रमा आवागमन सहज बनाउन सहयोग पुगेको छ।

म्याग्दीमा पहिरोका कारण अवरुद्ध आनन्दबगर हुँदै लामागरा जाने सडक नेपाली सेनाको गुरु गोरख गुल्मबाट खटिएको टोलीले २०८३ असोज १८ गते खुलाएको छ। पहिरोले सडक अवरुद्ध भएपछि स्थानीयको आवागमन प्रभावित भएको थियो। सेनाको टोलीले अवरोध हटाउँदै सडक पुनः सञ्चालनमा ल्याएको हो।

त्यसैगरी, म्याग्दीको बेनी नगरपालिका–६, कुडुलेमा स्थानीयवासीको सहकार्यमा खानेपानीको अवरुद्ध लाइन मर्मत गरी पुनः सञ्चालनमा ल्याइएको छ। बाढी तथा पहिरोपछि खानेपानी आपूर्तिसमेत प्रभावित भएका बेला स्थानीयको आवश्यकता र अवस्थालाई मध्यनजर गर्दै सेनाले तत्काल मर्मत कार्य अघि बढाएको हो।

यता, सडक डिभिजनको समन्वयमा मालढुङ्गा पुलको मर्मत कार्यमा समेत नेपाली सेना परिचालित भएको छ। पुल तथा सडकको क्षति मर्मतसँगै पर्वत, म्याग्दी र बागलुङमा पहिरोका कारण अवरुद्ध भएका सडक तथा पुल सञ्चालनमा ल्याउन जिल्ला विपद् व्यवस्थापन समिति, स्थानीय तह र अन्य सुरक्षा निकायसँग समन्वय गरी काम भइरहेको सेनाले जनाएको छ।

विपद्को बेला सडक भनेको केवल आवागमनको माध्यम मात्र होइन, उद्धार, उपचार र राहतको जीवनरेखा हो। त्यसैले एउटा सडक बन्द हुँदा त्यसको असर अस्पताल पुग्नुपर्ने बिरामीदेखि राहत पर्खिरहेका परिवारसम्म पुग्छ। यही संवेदनशीलतालाई ध्यानमा राख्दै सेनाले अवरुद्ध सडक तथा पुल तत्काल खुलाउने कार्यलाई प्राथमिकतामा राखेको देखिन्छ।

यसैबीच, मनाङमा बाढीले पुल बगाएपछि नेपाली सेनाले अस्थायी पुल निर्माण गरी आवागमन पुनः सञ्चालनमा ल्याएको छ। मनाङ सदरमुकाम चामेबाट माथिल्लो मनाङ जाने बाटोमा पर्ने ठाडो खोलामा रहेको पुल बाढीले बगाएपछि उक्त क्षेत्रमा यातायात तथा आवागमन अवरुद्ध भएको थियो।

नेपाली सेनाको नयाँ भैरवी दल गुल्मले अन्य सुरक्षा निकाय र स्थानीयवासीसँगको सहकार्यमा उक्त स्थानमा अस्थायी पुल निर्माण गरेको हो। अस्थायी पुल बनेपछि चामेबाट माथिल्लो मनाङतर्फको आवागमन पुनः सहज भएको छ।

प्राकृतिक विपद्ले पूर्वाधारमा क्षति पुर्‍याए पनि त्यसलाई लामो समयसम्म नागरिकको पीडाको कारण बन्न नदिन तत्कालीन उद्धारसँगै पुनःस्थापनाको काम उत्तिकै महत्वपूर्ण हुन्छ। सडक, पुल, खानेपानी र सञ्चारजस्ता आधारभूत संरचना शीघ्र सञ्चालनमा ल्याउनु नै विपद्पछिको पहिलो आवश्यकता हो।

बाढी–पहिरोले भत्काएको संरचना पुनःउभ्याउने क्रममा नेपाली सेना, स्थानीय प्रशासन, सुरक्षा निकाय, सडक डिभिजन र स्थानीयवासीबीचको सहकार्यले विपद् व्यवस्थापनमा समन्वयको महत्वसमेत देखाएको छ।

विपद् रोक्न नसकिएला, तर विपद्पछिको अवरोध हटाउन राज्यका संयन्त्र समयमै परिचालित भए नागरिकको पीडा र जोखिम भने अवश्य घटाउन  सकिन्छ।