गोप्य सूचना चुहावटप्रति गृह मन्त्रालयको कडा चेतावनी : ‘दुरुपयोग गर्ने जोसुकै कानूनको कठघरामा आउँछन्’
काठमाडौं, २० असोज । गृह मन्त्रालय र मातहतका निकायमा कार्यरत पदाधिकारी तथा कर्मचारीले पदीय हैसियतको दुरुपयोग गर्दै गोप्य तथा संवेदनशील सूचना अनधिकृत व्यक्ति वा निकायलाई चुहाउने प्रवृत्तिप्रति गृह मन्त्रालयले कडा चेतावनी दिएको छ।
गृह मन्त्रालयसँग सम्बन्धित एक अधिकारीले सामाजिक सञ्जालमार्फत राज्यका संवेदनशील सूचना कुनै व्यक्तिको निजी सम्पत्ति नभई सार्वजनिक जिम्मेवारी भएको उल्लेख गर्दै सूचना चुहावटप्रति गम्भीर ध्यानाकर्षण गराएका हुन्।
उनले पदले राज्यका सूचनामा पहुँच दिने भए पनि त्यसको दुरुपयोग गर्ने अधिकार नदिने स्पष्ट पारेका छन्।
राज्य संयन्त्रमा प्राप्त हुने सानोभन्दा सानो सूचना, सुराक वा गोप्य जानकारीसमेत अपराध नियन्त्रण, अनुसन्धान अघि बढाउन तथा भविष्यमा हुन सक्ने गम्भीर घटनाको सत्यतथ्य स्थापित गर्न निर्णायक बन्न सक्ने उनको भनाइ छ।
सामाजिक सञ्जालमा उनले लेखेका छन्, ‘राज्यको संवेदनशील सूचना कसैको निजी सम्पत्ति होइन, सार्वजनिक जिम्मेवारी हो। पदले सूचनामा पहुँच दिन्छ, तर दुरुपयोग गर्ने अधिकार दिँदैन।’
उनले राज्यले सुम्पिएको गोपनीयतामाथि जानाजान विश्वासघात गर्ने जोसुकै भए पनि उन्मुक्ति नपाउने चेतावनी दिएका छन्। त्यस्ता गतिविधिमा संलग्नलाई कानूनको कठघरामा ल्याइने उनको भनाइ छ।
‘राज्यले सुम्पिएको गोपनीयतामाथि जानाजान आफ्नो देश र संगठनमाथि विश्वासघात गर्ने जोसुकै होस्, कुनै उन्मुक्ति पाउने छैन, कानूनको कठघरामा ल्याइनेछ,’ उनले सामाजिक सञ्जालमा उल्लेख गरेका छन्।
