न्यूज अभियान
हरेक खबर विशेष खबर

काठमाडौं, २०८३ कात्तिक १०। 
नेपाल प्रिमियर लिग (एनपीएल) को तेस्रो संस्करणका लागि पोखरा एभेन्जर्सले द शाहंशाह अपार्टमेन्टलाई आफ्नो टाइटल स्पोन्सरका रूपमा घोषणा गरेको छ ।
मंगलबार आयोजित एक कार्यक्रमकाबीच पोखरा एभेन्जर्स र द शाहंशाह अपार्टमेन्टबीच सम्झाैता भएको हो ।
सम्झाैता पत्रमा शाहंशाह अपार्टमेन्टका निर्देशक प्रकाश अधिकारी र पोखरा एभेन्जर्सका महाप्रबन्धक अमित लोहनीले हस्ताक्षर गरे ।
यस सहकार्यले पोखरा एभेन्जर्सको व्यावसायिक साझेदारीलाई थप मजबुत बनाउनुका साथै नेपाली क्रिकेटको विकास र प्रवर्द्धनमा निजी क्षेत्रको सहभागितालाई प्रोत्साहन गर्ने विश्वास लिइएको छ ।
पोखरा र गण्डकी प्रदेशको प्रतिनिधित्व गर्ने पोखरा एभेन्जर्सले एनपीएल सिजन ३ मा उत्कृष्ट प्रदर्शन गर्ने लक्ष्यसहित तयारी गरिरहेको छ । आगामी कात्तिक ९ देखि मंसिर ५, २०८३ सम्म सञ्चालन हुने प्रतियोगितामा टोलीले आफ्नो खेल कौशल, प्रतिबद्धता र खेल भावनामार्फत समर्थकहरूको विश्वास जित्ने लक्ष्य राखेको छ ।
द शाहंशाह अपार्टमेन्टसँगको यो सहकार्यलाई पोखरा एभेन्जर्सले नयाँ उत्साह र सम्भावनाको रूपमा लिएको छ। यस साझेदारीले टोलीको यात्रा थप सशक्त बनाउने र नेपाली क्रिकेटप्रति समर्थक तथा व्यावसायिक क्षेत्रको आकर्षण बढाउन योगदान पुर्‍याउने अपेक्षा गरिएको छ।
पोखरा एभेन्जर्स द शाहंशाह अपार्टमेन्टलाई यस सहकार्यका लागि हार्दिक धन्यवाद व्यक्त गर्दै आगामी सिजनलाई सफल बनाउन उत्साहित छ ।
कुशल भुर्तेलको कप्तानीमा रहेको पोखराले एनपीएल सिजन ३ को पहिलो खेलमा बुधबार सुदूरपश्चिमसँग खेल्नेछ।

पोखरा एभेन्जर्सबारे
पोखरा एभेन्जर्स नेपाल प्रिमियर लिगमा सहभागी फ्रेन्चाइज टोली हो, जसले पोखरा तथा गण्डकी प्रदेशको प्रतिनिधित्व गर्दछ। नेपाली क्रिकेटको विकास, युवा प्रतिभाको प्रवर्द्धन र समर्थकहरूसँगको सम्बन्धलाई अझ सुदृढ बनाउने उद्देश्यका साथ टोली अघि बढिरहेको छ।