न्यूज अभियान
हरेक खबर विशेष खबर

नेपाली सेनाको आयोजनामा विभिन्न सञ्चारमाध्यमका १५ सञ्चारकर्मी सहभागी हाइकिङ, सेनाको नागरिक सम्बन्ध सुदृढ बनाउने प्रयास

काठमाडौं , कार्तिक १७ । नेपाली सेनाले सेना र सञ्चार क्षेत्रबीच आपसी विश्वास, सहकार्य र सद्भाव अभिवृद्धि गर्ने उद्देश्यसहित मंगलबार घ्याम्पे डाँडादेखि बुक्काछु गढी हुँदै डोलेश्वरसम्म विशेष हाइकिङ कार्यक्रम आयोजना गरेको छ।

मंगलबार सम्पन भएको एक दिवसिय कार्यक्रममा विभिन्न सञ्चारमाध्यममा आबद्ध १५ जना सञ्चारकर्मीको सहभागिता रहेको थियो। 

नेपाली सेनाका प्रवक्ता तथा निर्देशक राजाराम बस्नेतको नेतृत्वमा सम्पन्न कार्यक्रम केवल पदयात्रामा सीमित रहेन, बरु नागरिक र राष्ट्रिय सुरक्षा निकायबीचको सम्बन्धलाई थप आत्मीय बनाउने एउटा अर्थपूर्ण प्रयासका रूपमा समेत देखियो।

प्रकृतिको मनोरम सौन्दर्य, ऐतिहासिक भूगोल र धार्मिक आस्थालाई एकै यात्रामा समेटिएको यस कार्यक्रमले सहभागी सञ्चारकर्मीलाई काठमाडौं उपत्यकाको प्राकृतिक तथा सांस्कृतिक सम्पदासँग नजिकबाट साक्षात्कार गर्ने अवसर प्रदान गर्‍यो।

 घ्याम्पे डाँडाबाट सुरु भएको यात्रा बुक्काछु गढी हुँदै धार्मिक तथा ऐतिहासिक महत्त्व बोकेको डोलेश्वर महादेव मन्दिर पुगेर टुंगिएको थियो।

कार्यक्रमको सम्पूर्ण व्यवस्थापन सूर्यविनायकस्थित नेपाली सेना गणले गरेको थियो। सेनाले विभिन्न सञ्चारमाध्यमबाट सहभागी टोलीलाई आत्मीय र भव्य स्वागत गर्दै पदयात्रालाई व्यवस्थित, सहज र स्मरणीय बनाउन आवश्यक प्रबन्ध मिलाएको थियो।

नेपाली सेनाका प्रवक्ता राजाराम बस्नेतको नेतृत्व र समन्वयमा सम्पन्न यस कार्यक्रमले सेना केवल ब्यारेक र सुरक्षा जिम्मेवारीभित्र सीमित संस्था होइन, समाजका विभिन्न पक्षसँग संवाद, सहकार्य र सम्बन्ध विस्तार गर्न प्रतिबद्ध राष्ट्रिय संस्था पनि हो भन्ने सन्देश दिएको छ।

सेनाले समय–समयमा आयोजना गर्दै आएका यस्ता अन्तरक्रियात्मक, सामाजिक तथा सहकार्यात्मक कार्यक्रमले सञ्चारकर्मी र सुरक्षा निकायबीचको दूरी घटाउन, एकअर्काको भूमिका बुझ्न तथा राष्ट्रिय सरोकारका विषयमा सकारात्मक संवादको वातावरण निर्माण गर्न सहयोग पुर्‍याउँदै आएका छन्।

पदयात्राको अन्तिम गन्तव्य डोलेश्वर पुगेर सहभागी सञ्चारकर्मीले भोलेबाबाको दर्शनसमेत गरेका थिए। प्रकृतिको काखमा सुरु भएको यात्रा धार्मिक आस्थाको केन्द्रमा पुगेर सम्पन्न हुँदा कार्यक्रम थप अर्थपूर्ण बनेको थियो।

समग्रमा, घ्याम्पे डाँडादेखि डोलेश्वरसम्मको यो सहयात्रा केवल चार घण्टाको हाइकिङ थिएन; यो सेना र सञ्चार जगतबीच विश्वास, सद्भाव र सहकार्यको सम्बन्धलाई थप मजबुत बनाउने एउटा सकारात्मक सन्देश पनि थियो।