छैटौँ राष्ट्रिय खुला टेबलटेनिस प्रतियोगिता सम्पन्न
काठमाडौँ, २४ कात्तिकः ‘छैटौँ राष्ट्रिय खुला अन्तर वडा टेबलटेनिस प्रतियोगिता’ अन्तर्गत पुरुषको खुलातर्फ काठमाडौँ महानगरपालिका–२५ को टोली प्रथम भएको छ ।
नगाउँ स्पोट्र्स क्लबको आयोजना तथा कीर्तिपुर नगरपालिका–९ को समन्वयमा यही कात्तिक २१ देखि २३ गतेसम्म सञ्चालन भएको प्रतियोगितामा विभिन्न उमेर समूह तथा विधामा खेलाडीबीच प्रतिस्पर्धा भएको थियो ।
उक्त प्रतियोगितामा ललितपुर महानगरपालिका–७ दोस्रो तथा कीर्तिपुर नगरपालिका–९ र काठमाडौँ महानगरपालिका–२६ को टोली तेस्रो भएको थियो ।
यसैगरी, ४० वर्ष उमेर समूहमाथिको खुला एकलतर्फ काठमाडौँ महानगरपालिका–२६ का चन्दन शाही प्रथम, ललितपुर–७ का उमेश मानन्धर दोस्रो तथा ललितपुर–९ का मुकेश महर्जन र राजकुमार खड्गी तेस्रो भए ।
यसैगरी, ५० वर्ष उमेर समूहमाथिको खुला एकलतर्फ ललितपुर–११ का जयराम महर्जन प्रथम, ललितपुर–११ का राजेन्द्र बज्राचार्य दोस्रो, काठमाडौँ–१ का रक्तचन्द्र मानन्धर तथा ललितपुर– ११ का सुर्जा श्रेष्ठ तेस्रो भए ।
कीर्तिपुर टेबलटेनिस सङ्घका अध्यक्ष प्रशान्त महर्जनका अनुसार १६ वर्षमुनिको कीर्तिपुर आन्तरिक पुरुष एकलतर्फ कीर्तिपुर–३ का संयम गोपाली प्रथम, वडा–१ का शिरिष महर्जन दोस्रो र वडा–९ का भेरोन महर्जन र सुशन प्रधान तेस्रो भए ।
त्यस्तै, महिला खुला एकलतर्फ भक्तपुर–५ की दिव्या देउला प्रथम, ललितपुर–१७ की अर्सना महर्जन दोस्रो तथा ललितपुर–१९ की एम्रिन महर्जन र ललितपुर–१६ की काव्या शाक्य तेस्रो भइन ।
