Sunday 22nd of November | २०८३ मङ्सिर ६ आइतबार

न्यूज अभियान
हरेक खबर विशेष खबर

कृषि उद्यम प्रवर्द्धनमा कृषि विकास कार्यालय

न्यूजअभियान | प्रकाशित मिति : २०८३ मङ्सिर ५ शनिबार | (रासस)

दमौली (तनहुँ), ५ मङ्सिर: तनहुँमा उत्पादित कृषिउपजलाई प्रशोधन, प्याकेजिङ, ब्राण्डिङ तथा बजारीकरणमार्फत व्यावसायिक बनाउने उद्देश्यले सञ्चालन गरिएको कृषि उद्यम विकास कार्यक्रमबाट कृषक तथा कृषि उद्यमी लाभान्वित भएका छन् ।

    जिल्लास्थित कृषि विकास कार्यालयका प्रमुख परशुराम अधिकारीका अनुसार कार्यक्रमका लागि रु १३ लाख बजेट विनियोजन भएकामा रु नौ लाख ८१ हजार खर्च भएको छ । कार्यक्रमअन्तर्गत जिल्लाका ११ वटा कृषि फार्म, कृषक समूह तथा कृषि सहकारीलाई कृषि उत्पादनपश्चात् उपजको लेबलिङ, प्याकेजिङ, ब्राण्डिङ तथा बजारीकरणका लागि अनुदान सहयोग गरिएको छ । 

    कृषिउपजलाई परम्परागत रूपमा बिक्री गर्ने अभ्यासमा सुधार ल्याउँदै उत्पादनदेखि बजारसम्मको मूल्य शृङ्खला व्यवस्थित गर्ने प्रयास गरिएको अधिकारीले बताउनुभयो । किसानले उत्पादन गरेको कृषिउपजलाई आकर्षक तथा सुरक्षित रूपमा प्याकेजिङ गरी आफ्नै पहिचानसहित बजारमा लैजान सहयोग पुगेको उहाँको भनाइ छ । 

    कृषि उद्यम तथा कृषकलाई आवश्यकपर्ने विभिन्न कृषि प्रशोधन तथा प्याकेजिङ उपकरणसमेत सहयोग गरिएको छ । जसअनुसार चार वटा डिजिटल तराजु, एउटा रोष्टिङ उपकरण, नौ वटा सिलर उपकरण, तीन वटा डिस्क मिल, एउटा तोरी पोल्ने मिल, दुई वटा स्लाइसर उपकरण र चार वटा कम्बाइन मिल प्रदान गरिएको उहाँले जानकारी दिनुभयो ।

    त्यस्तै, एउटा बोक्रा तास्ने उपकरण, एउटा कनिका झार्ने उपकरण, एउटा ब्याज लेबलिङ उपकरण र एउटा सुकाउने उपकरणसमेत सहयोग गरिएको कृषि विकास कार्यालयले जनाएको छ । यी उपकरणको प्रयोगबाट स्थानीयस्तरमा उत्पादित कृषिउपजको प्रशोधन, ग्रेडिङ, प्याकेजिङ तथा लेबलिङ गर्न सहज भएको छ । यसले कृषिउपजलाई कच्चा पदार्थका रूपमा मात्र बिक्री गर्नुपर्ने अवस्थाबाट मूल्य अभिवृद्धि गरी बजारमा लैजाने वातावरण निर्माण गर्न सहयोग पुर्‍याएको छ ।

    कार्यक्रमअन्तर्गत विशेषगरी मकै, अदुवा, बेसार, महलगायत कृषिउपजको लेबलिङ, प्याकेजिङ, ब्राण्डिङ तथा बजारीकरण गरिएको कार्यालय प्रमुख अधिकारीले जानकारी दिनुभयो । उहाँका अनुसार कार्यक्रमबाट जिल्लामा ११ वटा कृषिमा आधारित कृषि उद्यम स्थापना भएका छन् । उत्पादनलाई व्यवसायसँग जोड्दै स्थानीय स्रोतसाधन र कृषिउपजमा आधारित उद्यम सञ्चालन गर्ने वातावरण निर्माण भएको उहाँको भनाइ छ । 

    कृषिउपजको उत्पादन बढाउनुका साथै त्यसको प्रशोधन र बजारीकरणमा ध्यान दिनसके किसानले उत्पादनको उचित मूल्य प्राप्त गर्नसक्ने भएकाले कार्यक्रमले कृषि उद्यमशीलतालाई प्राथमिकता दिएको हो । स्थानीयस्तरमा उत्पादन हुने मकै, अदुवा, बेसार, महलगायत उपजलाई प्रशोधन तथा प्याकेजिङ गरी बजारमा पठाउँदा उत्पादनको मूल्य अभिवृद्धि हुनुका साथै उपभोक्तासम्म गुणस्तरीय उत्पादन पुर्‍याउन सहयोग पुग्ने अपेक्षा गरिएको छ ।

    कार्यक्रमबाट १०८ जना कृषक तथा कृषि उद्यमी प्रत्यक्ष रूपमा लाभान्वित भएका छन् । तीमध्ये ६८ जना महिला रहेका कार्यालय प्रमुख अधिकारीले बताउनुभयो । महिलाको सहभागिता उल्लेख्य रहेकाले कार्यक्रमले कृषि उत्पादनसँगै महिलालाई उद्यमशीलतामा जोड्नसमेत सहयोग पुगेको कार्यालयले जनाएको छ ।

    कृषि विकास कार्यालयका प्रमुख अधिकारीले उत्पादन मात्र गरेर किसानको आय वृद्धि नहुने भएकाले उत्पादित वस्तुको प्रशोधन, प्याकेजिङ, ब्राण्डिङ र बजारीकरणलाई पनि कृषि विकासको महत्वपूर्ण पाटोका रूपमा अघि बढाउन आवश्यक रहेको बताउनुभयो । 
 

यो खबर पढेर तपाईलाई कस्तो महसुस भयो ?

न्यूज अभियान डट कमको एन्ड्रोइड एपका लागि यहाँ क्लिक गर्नुहोस् । हरेक खबर विशेष खबरका लागि अफिसियल फेसबुक र ट्वीटर मार्फत जोडिनुहोस् ।


न्यूज अभियान TV - ग्यालेरी

View All
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan
newsabhiyan