‘सडक बालबालिकाको संरक्षण गर्नु सबैको साझा दायित्व हो’
काठमाडौँ, १६ असोजः सडक बालबालिकाको संरक्षण गर्नु परिवार, समाज र राज्यको साझा दायित्व रहेको सरोकार भएका निकायका प्रतिनिधिले बताउनुभएको छ । आज यहाँ साथसाथ संस्थाद्वारा आयोजित सामाजिक परीक्षण कार्यक्रममा बालअधिकारकर्मीहरूले बालमैत्री समाज निर्माण गर्न सबैको सक्रियता आवश्यक रहेको धारणा राख्नुभयो ।
कार्यक्रममा सामुदायिक प्रहरी बिना दाहालले बालबालिकाको असल विकासका लागि अभिभावकलाई शिक्षा दिने अभियान चलाउनु पर्ने धारणा राख्नुभयो । उहाँले पछिल्लो समय सानो उमेरमा कुलतमा फस्ने प्रवृत्ति बढ्दै गएको बताउँदै यसका लागि प्रहरी, सामाजिक संस्था र स्थानीय तहका जनप्रतिनिधिको संयुक्त पहलमा काम गर्नुपर्ने बताउनुभयो ।
काठमाडौँ महानगरपालिका-११ का वडासदस्य आशा श्रेष्ठ रौनियारले बालबालिकालाई सामाजिक र नैतिक मनोपरामर्श दिनुपर्ने आवश्यकता औँल्याउनुभयो । अधिवक्ता रसना ढकालले परिवारको माया र स्याहारको अभावले गर्दा बालबालिका घर बाहिर निस्किन बाध्य हुनुका साथै कुलतमा फस्ने सम्भावना रहेकाले यसप्रति परिवार सचेत हुनुपर्ने बताउनुभयो ।
संस्थाका अध्यक्ष सुचिता शाहले बालबालिकाको भविष्य राज्यसँग जोडिएकाले उनीहरूलाई सही मार्ग निर्देशन गर्न राज्यले पर्याप्त लगानी गर्नुपर्ने बताउँदै सिकाइमा आधारित शैक्षिक क्रियाकलाप सञ्चालन गर्नुपर्नेमा जोड दिनुभयो ।
