न्यूज अभियान
हरेक खबर विशेष खबर

पूर्वी इन्डोनेसियामा शनिबार बिहान गएको ७.७ म्याग्निच्युडको भूकम्पको केही घण्टापछि नै देशको उत्तर सुमात्रा प्रदेशमा ६.४ म्याग्निच्युडको परकम्प गएको इन्डोनेसियाको मौसम विज्ञान, जलवायु विज्ञान तथा भौगर्भिक निकाय (बिएमकेजी) ले जनाएको छ। 

भूकम्पपछि त्यहाँ थुप्रै परकम्प गएको बताइएपनि यो एकै दिनमा गएको दोस्रो शक्तिशाली कम्पन हो।

पूर्वी इन्डोनेसियामा गएको ७.७ म्याग्निच्युडको भूकम्पले दर्जनौं मानिसको ज्यान लिएको थियो र अस्थायी सुनामी चेतावनी जारी गरिएको थियो, जुन पछि हटाइएको थियो।

बिएमकेजीका अनुसार पछिल्लो शक्तिशाली परकम्प स्थानीय समयअनुसार दिउँसो ५ः५४ बजे गएको थियो। यसको केन्द्रविन्दु उत्तर सुमात्राको सिमालुन्गुनबाट करिब ११ किलोमिटर दक्षिणपूर्वमा जमिनमा ने रहेको रयसको गहिराइ १६३ किलोमिटर रहेको बताइएको थियो।

बिएमकेजीले परकम्पको प्रभाव उत्तर सुमात्राका धेरै क्षेत्रहरूमा महसुस भएको बताएको छ र यसमा सुनामीको सम्भावना नभएको जनाएको छ।

अहिलेसम्म यसबाट भएको भौतिक वा मानवीय क्षतिको कुनै तत्काल रिपोर्ट आएको छैन।

इन्डोनेसियाको पूर्वी फ्लोरेस टापु नजिक शक्तिशाली भूकम्प गएपछि शनिबार उद्धारकर्मीहरूले भग्नावशेषमा बाँचेकाहरूको खोजी गरिरहेका समय अर्को शक्तिशाली भूकम्प आएपछि उद्धार कार्यलाई पनि प्रभावित पारेको थियो । 

शनिबार बिहान गएको भूकम्पका कारण कम्तीमा ४७ जनाको मृत्यु भएको प्रकोप अधिकारीहरूले बताएका छन् । 

राष्ट्रिय प्रकोप व्यवस्थापन एजेन्सी (बिएनपिबी) ले शनिबार साँझ मृत्यु हुनेको संख्या ४० बाट बढाएको हो। उद्धार अधिकारी फाथुर रहमानका अनुसार ७.७ म्याग्निच्युडको भूकम्पमा ५० जना घाइते भएका छन्।

बिएनपिबीका प्रमुख सुहार्यान्तोले यसअघि धेरै भवनहरूमा मानिसहरू फसेको बताउनुभएको थियो । “फसेका मानिसहरूको उद्धार प्रकोप व्यवस्थापन टोलीहरूका प्रारम्भिक लक्ष्य हुनेछन्,”सुहार्यान्तोले भन्नुभयो । 

इन्डोनेसियाको पूर्वी भागमा रहेको लोकप्रिय पर्यटकीय टापुमा भूकम्प जाँदा करिब १६० घर, दर्जनौं शैक्षिक तथा स्वास्थ्य सुविधाहरू र अन्य सार्वजनिक भवनहरू क्षतिग्रस्त भएको बिएनपिबीले जनाएको छ।