न्यूज अभियान
हरेक खबर विशेष खबर

काठमाडौं, १ साउन । नेपाली राजनीतिमा एउटा उखान निकै चर्चित छ "राजनीति गर्नेहरूले व्यापार गर्दैनन्, तर व्यापारीहरूले राजनीति चलाउँछन्।" नेकपा एमालेका उपमहासचिव तथा पूर्वअर्थमन्त्री विष्णु पौडेल र नेपालका 'महा-बिचौलिया' का रूपमा चिनिएका विवादास्पद व्यवसायी दीपक भट्टबीचको सम्बन्ध पनि ठ्याक्कै यही उखानको जीवित रूप हो।

यी दुई पात्रबीच कुनै लिखित सम्झौतापत्र छैन न त कुनै कम्पनीको सेयरधनीको सूचीमा दुवैको नाम सँगै भेटिन्छ। तर, शक्तिको केन्द्र बालुवाटारदेखि नीतिगत भ्रष्टाचारका ठूला अखडाहरूसम्म यिनीहरूको ‘अदृश्य व्यावसायिक साझेदारी’ यस्तो 'ओपन सेक्रेट' (खुला रहस्य) बनेको छ, जसलाई राजनीतिक वृत्तमा सबैले बुझ्छन्, तर मुख खोल्न डराउँछन्।

बालुवाटारको ‘कनेक्सन’: जग्गादेखि जलविद्युतसम्म
विष्णु पौडेल र जग्गा प्रकरणको नाता पुरानै हो। ललिता निवासको 'बालुवाटार जग्गा काण्ड' मा आठ आना जग्गा छोराको नाममा फिर्ता गरेर 'नीतिगत चोखिने' कला देखाएका पौडेलका लागि दीपक भट्ट शक्तिको नयाँ पुल बनेर भित्रिए।

पछिल्ला वर्षहरूमा ठूला पूर्वाधार, जलविद्युत, र दलाल पुँजीवादका हरेक ठूला आयोजनामा भट्टको अदृश्य उपस्थितिलाई बलियो बनाउने काममा पौडेलले ‘नीतिगत सहजकर्ता’ को भूमिका निभाउँदै आएको आरोप लाग्ने गरेको छ। भट्टले सेटिङ मिलाउने र पौडेलले त्यसलाई मन्त्रिपरिषद् वा अर्थ मन्त्रालयमार्फत 'वैधानिकताको छाप' लगाइदिने यो साझेदारी निकै लोभलाग्दो गरी चलिरहेको छ।

अर्थ मन्त्रालयको चाबी र बिचौलियाको राज
विष्णु पौडेल जब-जब अर्थ मन्त्रालयको कुर्सीमा उक्लिन्छन्, तब-तब दीपक भट्टका व्यावसायिक घरानाहरूमा दीपावली सुरु हुन्छ। बजेट निर्माणका क्रममा निश्चित व्यापारिक घरानालाई पोस्ने गरी करका दरहरू हेरफेर गर्नेदेखि लिएर चिनियाँ तथा पश्चिमा कम्पनीका ठूला ठेक्कापट्टा सेटिङमा हत्याउनेसम्मका खेलमा यो जोडीको नाम अग्रपंक्तिमा आउँछ।

"हामी त सर्वहारा वर्गका नेता हौँ" भन्दै भाषण छाँट्ने पौडेलको राष्ट्रवाद र समाजवाद, दीपक भट्ट जस्ता कर्पोरेट खेलाडीहरूको सुविधाभोगी बैठक कोठामा पुगेपछि कसरी बिलिन हुन्छ भन्ने कुरा उनीहरूले गरेका नीतिगत निर्णयहरूले छताछुल्ल पारेका छन्।

अदृश्य लगानी, दृश्य विलासिता
संसद् र सार्वजनिक मञ्चहरूमा एमालेका कडा वक्ताका रूपमा प्रस्तुत हुने विष्णु पौडेलको शालीन छविभित्र लुकेको यो व्यावसायिक पाटो निकै रोचक छ। कुनै पनि कम्पनीको कागजातमा पौडेलको नाम भेटिँदैन, तर भट्टले हात हालेका हरेक मालदार आयोजना चाहे त्यो विवादास्पद सेक्युरिटी प्रिन्टिङ प्रेसको ठेक्का होस् वा बूढीगण्डकी जस्ता ठूला जलविद्युत आयोजनाको लाइसेन्स ओसारपसार त्यहाँ पौडेलको 'आशीर्वाद' र 'अदृश्य लगानी' रहेको दाबी राजनीतिक विश्लेषकहरू गर्छन्।

बजारमा हल्ला त यो पनि छ कि "भट्टले कमाउने हरेक रूपैयाँको एउटा अदृश्य हिस्सा पौडेलको राजनीतिक र व्यक्तिगत साम्राज्य सुरक्षित राख्न 'फ्युल' का रूपमा प्रयोग हुने गर्छ।"

निष्कर्ष: समाजवादको आवरणमा बिचौलिया राज
जनता महँगी, बेरोजगारी र आर्थिक मन्दीले 'हिक्क हिक्क' गर्दैछन्। तर, सत्ताको छहारीमा बसेका विष्णु पौडेल र उनकै फेरो समातेर राज्यको ढुकुटी दोहन गर्ने दीपक भट्टहरू भने दिन दुई गुणा, रात चौगुणा धनी भइरहेका छन्।

सर्वसाधारणले तिरेको करबाट ठड्याइएको सत्ताको महलमा बसेर बिचौलियासँग 'अदृश्य पार्टनरसिप' गर्ने यस्ता नेताहरूले देशलाई कता लैजाँदैछन्?

समाजवादको नारा बोकेको पार्टीका शीर्ष नेता र बिचौलियाको यो 'कसिलो अङ्गालो' ले नेपाली राजनीतिको कुरुप अनुहार मात्र प्रदर्शन गरिरहेको छैन, संसदीय व्यवस्थाकै उपहास गरिरहेको छ।

यो पनि पढ्नुहोस् :
दीपक भट्टको 'धन्दा–पानी' मा सामेलहरु किन ओझेलमा ? पूर्व आईजीपी सिंहसँगको सम्बन्धबारे उठेका प्रश्नको जवाफ कसले दिने ?

विवादास्पद व्यवसायी दीपक भट्टसँगको सम्बन्धपछि अनुसन्धानको घेरामा जयवीर देउवा

वित्तीय अनियमितता, मनी लाउन्डरिङ र ठूला व्यवसायीमाथिका आरोप: निष्पक्ष छानबिनको माग फेरि चर्कियो

डिल्लीबजारबाट नख्खु र सुन्धारासम्म : विवादास्पद व्यवसायी दीपक भट्ट र पूर्वमहानिर्देशक प्रदीप अधिकारीको कारागार स्थानान्तरणले उठायो प्रश्न

सुन्धारा र डिल्लीबजार कारागारमा ‘भिआईपी बन्दी’ को आकर्षण, भट्ट–अग्रवालको भव्य स्वागत